الراجل مش صاحب الأرض و انتِ ضيفة عليه
25 مايو 2015
أحب أعرفكم بنفسى فى البداية- بنت مصرية – السن 25 سنة... التوصيف: ضيفة على كوكب الأرض.. مش لوحدى على فكرة أنا و كل البنات تحس إننا جايين من كوكب تانى نازلين ضيوف على أهل كوكب الأرض اللى هما "الرجالة" .. من أول ما اتولدت وانا بسمع "البنات المحترمة متضحكش بصوت عالى و كأن الضحك دا حاجة لامؤاخذة مش من حقنا ... البنت المحترمة متتأخرش بره البيت أما هنا فمفهوم الاحترام بيختلف من بيت للتانى- يعنى فيه بيت الاحترام فيه من الساعة 8 وفيه بيت من 10 أما فيه بيوت متبقيش محترمة لو دخلتى بعد 12 و انت وحظك نت من أنهى بيت...
البنات المحترمة متخرجش كل يوم... لازم تقعد فى البيت شوية و كأنها بتقعد فى البيت على شاحن الاحترام، و لما بتخرج الشحن بيفضى مع إن الرجالة مبيروحوش البيت أصلا..
الأنقح و الأدل بقى أنه واخد حقه فى كل الأخطاء الاجتماعية.. و كأن الرذيلة من الرجالة فضيلة.. الراجل يغلط عادى ما هو راجل (فى بيته بقا وهو حر) لكن الستات (الضيوف من الكوكب الآخر ) مينفعش طبعا... و كأن الرذيلة للرجال فقط (النساء يمتنعون) مع إن الأديان السماوية كلها حرمتها على الاتنين.. مش بس كده الولد يصاحب عادى و يكلمها أدام أهله و مفيش مانع لو حكلهم تفاصيل العلاقة و الأم يترسم على وشها سعادة بالغة و تقول "ابنى حبيبي البنات بتموت فيه" أما البنت يا ولداه لوعندها أصحاب ولاد بيتكلموا مع بعض فى السياسة الأهل يحسوا إن الوضع برضوا مش مريح و نبدأ فى اسطوانة "متنسيش إننا فى مجتمع شرقى" فالبنت يا عينى تحس أن أوضتها فى الشرق الاوسط و أوضة أخوها فى شرق أوروبا.. فيرجعوا و يقولولها دا ولد هيخسر إيه.. "و كأن الخسارة شىْ مادى ملموس مش فى الأخلاق" ...
عشان كده حبيت أهدى لكل أصحاب هذا الكوكب "الرجالة" أغنية "رافضك يا زمانى يا اوانى يا مكانى أنا عايز أعيش فى كوكب تانى" شكرا للفنان مدحت صالح...
مع تحياتى منة عامر..