أنا مش حجر
ومانيش صنم
ولا نيش رسول الخُرس
فى بلاد البجم
رافض أكون المنتهى
وأنا مبتدا
وإزاى أكون الانحنا
وأنا ضى سارح في المدى
ده أنا كنت أول حرف في حروف الندى
يوم ما التاريخ فتح عيونه وحسّنى
تسبيحه جوّه الأفئدة
طرح الغُنا.. فرح اللُقا
فُك الحصار وانطق بقي
طلع النهار م الشرنقة
والفجر رافض يندبح
أو يتشنق فوق الوتد
والكلمة في ميزان العدم
والروح في سجن من البدن
حلمى المسافر للوطن
واقف على شط العطش
بين المزامير والوثن
لوّن ملامح ضعفنا
زمن انعدام الحس
والشوف والألم
كل الوشوش نفس الشبه
كل المعانى الميتة
زهقانة من برد الشتا
واقفة علي حدود الخَرس
وسط الغياب لمحت سطور الدمدمة
والحزن نازف م الوريد
لون عيون السنبلة
أسراب عبيد.. داخلين تاريخ الارتجاف
والاهتزاز والابتزاز والاعتكاف
والدنيا ماشية بزمبلك
كش الوزير
كش الملك
نهرب لبعض ونبتدي
أول حروف الملحمة
رف نقص أحلام الوطن
راح يكتمل حلم الأمل